Karya Bahasa Bidayuh

Karya Bahasa Bidayuh

 



 


 

Cikgu

Mary Clare Anak Usen (5K2)



 


Cikgu…..

Akam mah dŭ susah payah

Ngajar dengan piju-an ami

Dŭ anak murid akam

Akam nyugon

Sanda dŭ biguna

Ndŭg ami

Mada ami merui misiya

Dŭ puno dengan ilmu



Cikgu….

Walaupun ami

Kai piduli sanda akam

Pak, akam kai leju-leju

Pitayŭn ami

Pinyusah andŭ dengan amang ami

Dŭ jara udog ujan dengan siru

Ngin aga mada ami

Ngajah chunto bala nŭh



Cikgu….

Akam muka jaran ndŭg ami

Akam ngumbit ami masu pitŭ

Ngaban ami ngajung jawa

Jawa pinyanggi dŭ bauh





 

 



 


 

Dinganku

Catherine Anak Pangky (5K2)







Oh… dinganku

Kai dapat aku kambŭt

Kenangan kita duweh dŭ ngamin nŭh

Silalu birayo gati ga-ih

Anyap kala kita bidaruh

Ato pun kita bikaji pan adŭp



Dingan ku…

Iti nŭh kita mbuh bitingkah

Bitingkah bŭkŭn nŭh bikaji

Pak sawa mbŭh ira ubo

Mbŭh tok masa nŭh aku tagan sikulah

Ndŭg amu dŭ mantag

Bilajar rŭjŭng sen dapat pass



Dinganku…..

Umon batŭhku rabu nitih amu

Pak dŭ asŭngku ti

Ngarapku pass, supaya dapat bidapud lagi

Dengen amu oh.. dinganku….

Silamat bitingkah…

Aku jalan tayŭ yah!





 

 



 


 

Kale Biru

Laura (5K6)







Biru si-en kale awangku

Dŭ bibarut dengan rangit tarang



Biru si-en bajuhku

Dŭ jetak beda nafsu kejam



Biru si-en kunci pimudipmu

Dŭ biragan dŭ ancah pimagau



Biru si-en kurit amu

Dŭ puno beda bala kandam



Biru si-en kunci angin amu

Dŭ bilampar dŭ awang pinyusah



Biru si-en buk amu

Dŭ bitulis sejarah pimudip



Biru si-en angan-angan amu

Dŭ marui kisah piameh



Biru si-en lagu amu

Dŭ meda awangku tirawŭ



Biru si-en dunya amu

Dŭ kai pandai mangan





 

 



 


 

Omon Batuh Namba Tu’uh

Catherine Anak Pangky (5K2)







Indi andu buran enum tiap-tiap sawa

Andu pingirami bangsa kita

Pingirami du bipu’un

Masu tayung babuk kita



Mileh siok, mileh panga

Bala dayung kiraja du abuh

Nanuk pangkang dengen ngundah ruti

Ati aih dapat nadek sekeh



Ngarum sien du taluk abuh

Ngulu ni urang namba tuuh

Du tuda abuh bala bujang ripu rami

Bidisko, bijoget, dengen mejeng

Pak ayap lagi ngajat

Anyap lagi inya bilanggi

Anyap lagi namba tuuh birayun



Omon batuh namba tuuh rabu

Tanda rabu nu batan asal bidayuh

Anyap kayuh du patut pinuji lagi

Manih mudip ngaya batan asal inya

Oh…bala dinganku kirih kanang sibayuh jalan

Oh… bala dinganku aba maman juho bina





 

 



 


 

Pantun Inya Bujang

Catherine Anak Pangky (5K2)







Anak inya ngumbit su’ah

Tinan nyiluk bu’ak jambu

Asung aku ngan menu susah

Ira bitingkah dengan amu



Da tunduh bangku aku ngulu

Ngumbit mancis ngucul diyen

Asungku menu suka dangan amu

Aduhkah amu pun meng sien?



Muhun anjan lalu rabu

Rabu mangka anak sirati

Kai aku kambut sanda amu

Dingan da damba susah ginanti



Dawe ntawa rabu ngilayang

Lalu ngatek da’an sukun

Kai ku ngarap sandamu bujang

Da babak sidi, da asung bibekun





 

 



 


 

Milang Andu

Laura (5K6)







Andu iti andu indi

Bukak buk bukak awang



Andu de duweh andu duweh

Cuba maca buk cirita



Andu de taruh andu taruh

Tumbit pembilang bilajar ngitong



Andu de empat andu empat

Baca kamus nambah pimpuan



Andu de rimuh andu rimuh

Joboh maring birayo bisamah



Andu de enem andu enem

Aba kambut nulung amang ande



Andu de ijuk andu minggu

Dunya sikulahmu bayuh mangan





 

 



 


 

Wang Manih Andu

Laura (5K6)







Wang manih andu neh

Misia ira bidamai

Bekenkah ahi cara neh

Janji adep pandai



Wang manih andu neh

Anak ngan andu ira bidapud

Aba mina duwah piameh

Biar anchah bidared-dared



Wang manih andu neh

Anak irak nitih amang

Aba kambet jasa balaneh

Biar juho biramang-biramang



Wang manih andu neh

Kita Malaysia ira maju

Samah meng taraf inya beken

Bipikir pintar, ngundah kiraja pan laju



Wang manih andu neh

Dunya ira puan rati pimudip siti

Biar asau ato baneh

Anak-anak pun perlu mirati







 

 



 


 

Pitiyen Budi Andŭ

Tracy & Monnie (1C)







Bisewa aku magau

Sanda dŭ paling betul

Ira muji jasa akam

Pak ŭntŭkku beku,

Kai dapat mikir,

Jilehku pun bigelut

Kai dapat nyebut nŭh.



Mbŭh ku nulis baris-baris sanda

Ira pidatuh pinyalau akam

Pak ubang sandaku

Kai dapat nanding budi akam.



Jewi akam tening

Walaupun asŭng akam susah

Suara akam lembut mujuk wang aku beji

Sanda akam mung omon maman mesu darŭd

Bebi nyusur dŭ asŭng aku

Damai selamat dŭ asŭng akam

Mung lepas mesu semua pinyusah.



Asŭng aku nitih tiyan akam

Pengorbanan akam kai dapat ku malas nŭh

Pak duwah asŭngku

Sentiasa tiyen budi akam

Oh … andŭku





 

 



 


 

Pinyayang Masu Amang

Goretine ak Bugi (2A)







 
Bilajar mŭnŭ nganchak asŭngku lejuk. Si-en mah masu pimahamku. Mŭnŭ pun mung si-en., aku ginolong beda bala cikgu duwah anak sikulah harapan sewa 2005 dŭ UPSR. Mungkin kelebihanku lebih tenggah masu inya bekŭn wang si-en.

Amangku wang si-en ngantung harapan ndŭg aku. Mŭnŭ asŭng amangku wang si-en gŭntŭ ira meda aku ngumbit 5A dŭ UPSR. Pingarap nŭh si-en mbŭh puruh nŭh masu aku lagi biumur 6 sewa. Amangku ka-i putus asa ngajar aku pu-an huruf A tok Z, ngin nŭh ira nganchak aku bijaya duwah pimudipku, biar nŭh susah payah megau bilanja. Pak manihkah aku ngirasa bilajar wang si-en mudah saja. Tiap kali test, simua subjectku hampir dapat A walaupun aku ngulangkaji last minute.

Pak iti nŭh susah rayŭ dapat keputusan dŭ paguh. Mungkin sebab pirangaiku mbŭh birubah. Udipku mbŭh ira birayo gati-gaih ayo bala dingan. Aku ka-i lagi kaping pijuan amangku. Semua nŭh merŭt su kaping nta-uh lu-ah su kaping mahit. Mbŭh obo kiraja sikulah aku terus tubŭk TV, kan ka-i pun birayo atau birubi degen bala dingan. Kan tubŭk TV, mesti sampe tok pukul simehŭng bingarŭ. Adŭh-adŭh saja cirita dŭ narik batŭhku tubŭk nŭh..

“Nak…..,” masu ba-ak nyigŭ amangku ngaba.

“Manih bayuh bŭ-ŭs? Pagi amu adŭh sikulah. Aba ringgo ngundah adŭp,” amang terus nutup TV. Aku mpuhab lalu nyiring ndŭg amang.

“Bayuh mang!,” kuan aku lalu ira muka TV ba-uh pak amangku daruh manangku.

“UPSR ka-i tuhai lagi. Buran ba-uh…. Inya wang masa iti bilajar, bekŭn nŭh ngundah kiraja bekŭn,” kuan amang. Aku mina kaping sanda amang masu pitak. Kecewa asŭngku pak dog tijen. “Ah! UPSR…. UPSR. Sien-sien silalu dog sinanda… bŭkŭn nŭh akam ira ujian….,” kuanku wang adŭp.



Indi buran mbŭh si-en…



Amang jagŭ brupagi makat ira mutong petek. Amang anyap nyanda anih-anih walaupun sanda pitayŭn ndŭg aku sibayuh tagan ramin. Indi kali lagi asŭngku kecewa. Amang ka-i nak nyugon sanda pijuan ato simangat ndŭg aku. Mŭnŭpun mung si-en, aku pisaya adŭpku buleh ngundah paguh duwah test UPSR.

Masa inya test, aku ngundah anih saja dŭ pu-anku. Entŭkku mŭnŭ-mŭnŭ kosong wang si-en ngin ngundah ulangkaji last minute. Ka-i aku dapat ngingat anih dŭ bilajar ku silama ti. Semua si-en ka-i dapat mŭrŭt. Aku bŭ-ŭs wang inya lagi ngundah test ngin aku lambat bŭ-ŭs ngarŭ si-en..

“Mong anih testmu ijŭn?” siken amang wang masa ma-an. Ka-i aku nyaut pinyiken amang. Aku mina nginyem lalu nyengkŭm sungkoi ndŭg bebŭku. Mbŭh ma-an, aku ndug pitak ngin ira bilajar lalu ngumbit buk Matematik. “Ah! Nan anih ngulangkaji lagi. UPSR kan mbŭh rimpas,” kuanku dŭ aseng lalu nyimpan buk si-en dŭ tunduh katil.



Wang pangan sawa …



Masa ngumbit buk laporan mŭnŭ ngundah asungku senang, pak senangku si-en bitukar wang ku rasa andu si-en andu dŭ paling nganchak asŭngku mendam. Keputusan dŭ narap ku ka-i sepaguh dŭ kuanku. Guru Besar piluah rasa kecewa nŭh ndŭg keputusan aku. Umon batŭhku terus rabu ka-i ngira masa. Keputusan 2A 1B 2C mŭnŭ meda asŭngku rasah. Si-en salahku lagi ngin ka-i ngkaping sanda amang.

Meri ndŭg ramin terus aku mŭrŭt pitak. Tutupku nyigŭ lalu nguleng dŭ tunduh tilam tangin mu-as. Ka-i ku sanggup nandah amang pu-an keputusanku du teruk si-en. Aku pu-an adŭpku mbŭh pirasah harapan simua inya lebih-lebih lagi harapan amangku dengan bala cikguku. Aku mu-as ka-i tiyan sampe tok manih. Makat bŭ-ŭs saja aku ngirih amang dŭ bangih katil tangin magŭh slip keputusanku. Umon batŭhku luwah lagi dŭ bibih batŭh. Mbuh si-en, nŭh birajung laju mung inya biguling masu darŭd dŭ sambu anyap bala batang nahan nŭh.

“Nampunku amang…. aku ka-i berniat ira pirasah…. pingarap masu asŭng akam,” kuanku tangin mŭ-ŭb tira-un nkirih lampu de bijawa masu batŭh amang.

“Ka-i manih nak. Asal amu tiyan, gagal indi kali ka-i bireti nŭh adŭp gagal tok ijŭ. Mbŭh ti, bilajar mŭnŭ-mŭnŭ. Aba piringgo adŭp lagi mŭhŭn dapat keputusan dŭ paguh duwah PMR,” kuan amang lubah. Tangin tangan ri-ang amang nunjul sampul surat ndŭg aku. Aku nyiring amang. Amang nyugon aku RM20.00 dadag 2A de dapatku. Aku mu-as ngin ka-i nyangka amang maseh nyugon duit si-en walaupun keputusanku ka-i mung dŭ kira adŭp nŭh.

“Terima kaseh, amang,” kuanku lalu mu-as dŭ pangku amangku. Ka-i nyangka umon batŭh dŭ rabu misa siluar amang. Masu si-en, aku bijanggi ka-i ringgo duwah anih saja dŭ tundahku. Ngin aku agak gagal kali keduwŭh. Aku pun terima kaseh ndŭg amangku ngin pinyayang nŭh ndŭg aku. Aku bijanggi kai nganchak asŭng amangku kecewa lagi.






 

 



 


 

Tanen Manih Tigareg Ngaba Ujan

Jessica ak Julet (1E)







 
Kisah ti pasal Kiau dengen Piamang. Bala duwŭh ti adi-biradi. Inya duwŭh si-en kiraja nŭh ngundah ramin. Indi andu mandŭg boh dayung kumang ira muhun mamuh. Dayung kumang si-en panu nyeseg ramin inya duwŭh si-en. Dayung kumang si-en nyiken, “Irakah duan ngantud aku ngkaduh sibu mambang kumala?”. Saut inya duwuh si-en, “Anih kuan amu dek?” Lalu dayung Kumang si-en nyanda lagi. “Masi bŭngŭ aku tubŭk duan ngundah ramin. Mbŭh marui ramin duan?” Saut inya duwŭh si-en, “Lagi ngejem tungkang.” Andu dŭ indi, dayung kumang si-en nyiken lagi pinyiken dŭ samah. Tiap-tiap andu dayung kumang si-en nyiken piyiken si-en tiap kali nŭh lalu nyeseg ramin Kiau dengan Piamang.



Tuhai-tuhai, ramin inya duwŭh si-en pun jaji. Lema ramin inya duwŭh si-en mbŭh jaji, dayung kumang si-en dadu nangku ga-in, nanŭk sungkoi dengen kanŭh nyugon dŭ duwŭh si-en. Indi andu inya duwŭh si-en pun nyiken tayung Sikandang, “Oh tayung, asih dŭ silalu nanŭk nyugon ami duwŭh nah?” Lalu saut sungkuh tayung Sikandang dŭ bi-ek, si-en cheh Sirangei dengen Sibujer, “Ami dŭ nanek nyugon kinde.” Kiau dengen Paimang kai pisaya inya dŭ duwŭh si-en. Wang masa si-en dayung Kumang pun pitenggah adŭp nŭh. Inya duwŭh biradi si-en pun sina dengan dayung Kumang si-en.



Pak bala dŭ duwŭh si-en kai dapat kongsi indi dayung. Jaji bala nŭh ngaba tayung Silimai dŭ ngandai dŭ rangit. Bala nŭh ira meda tayung Silimai nadag dayung si-en jaji duwŭh. Lalu tayung Silimai pun muhun masu rangit tingin nŭh macha, “Dik yang rawŭh, didik beda duwŭh. Dik yang rawŭh, didik beda mesen.” Lalu dayung Kumang si-en pun jaji duwŭh, Indi piganan nŭh Dadih dengan dŭ dindi piganan nŭh Basung. Jaji inya duwŭh si-en pun masau dengan Kiau dengan Piamang. Kiau mendu Dadih dengan Piamang mendu Basung.



Lema bala nŭh mbŭh jaji asau dengen banŭh, Kiau dengan Piamang selalu tagan asau bala nŭh dŭ ramin ngin inya duwŭh si-en selalu ngirumŭn dŭ tarun magau ikan dengan jelu. Tagan inya duwŭh si-en anyap dŭ ramin, tayung Sikandang netak pinjan rengah ramin Kiau dengen Piamang. Wang si-en Dadih dengen Basung mamuh, jaji kai bala nŭh puan tayung Sikandang netak pinjan si-en.



Tujuan tayung Sikandang netak pinjan si-en ngin nŭh ira nganchak Kiau dengan Piamang mikir bala asau nŭh adŭh ngundah hubungan dengen dari dŭ bŭkŭn. Mŭhŭn Kiau dengan Piamang papar dengan asau nŭh. Jaji dapatlah sungkuh tayung Sikandang dŭ bi-ek, Sirange dengen Sibujer kawin dengen dayung Kumang dŭ duwŭh si-en.



Lema Kiau dengen Piamang meri aji, tayung Sikandang terus pidaan dŭ duwŭh si-en pasal pinjan rengah dŭ rasah dengen cerita menang asau dŭ duwŭh si-en adŭh hubungan dengen dari bŭkŭn. Tayung Sikandang menang bala dari si-en selalu nangku mŭrŭt ramin mesu pinjan dŭ rasah si-en. Inya dŭ duwŭh si-en lalu beji rayŭ. Terus dŭ duwŭh si-en naran bala asau nŭh nganchak bala nŭh meri ndŭg tayung Silimai dŭ rangit.



Asau dŭ duweh si-en kai nŭh baji dengn banŭh nŭh. Mbŭh dŭ duweh si-en bisimpan, bala nŭh nyanda dengen banŭh nŭh, “Oh Kiau dengen Piamang, ira panu ami duwŭh.” Saut bala dŭ duwŭh si-en tingin beji, “Panu boh gaih, anih nandai lagi.” Dadih dengen Basung pun ngaba tayung Silimai nganchak nŭh pituhun anjan masu rangit pak tayung Silimai kai pituhun anjan. Neh pituhuun nyipŭh. Lalu dŭ duwŭh si-en pun ngandai dŭ ungkui nyipeh si-en.



Lema nyipeh si-en nyumak ndŭg rangit, dengen andu jaji pŭtŭ beda nyipŭh si-en, pajin Dadih dengen Basung pidaan ndŭg Kiau dengen Piamang, “Oh Kiau dengen Piamang, tayung



Sikandang dŭ pirasah pinjan rengah ramin ngin nŭh ira meda kita papar.” Wang Kiau dengen Piamang kidingah sanda dŭ duwŭh si-en, bala nŭh terus ngaba asau bala nŭh balik. “Balik Dadih. Balik Basung. Kain, lumbok, piso dengen amak duwŭn manteg.” Pak Dadih dengen Basung mbŭh aga balik ngin bala nŭh mbŭh tok rangit.



Kiau dengen Piamang beji rayŭ dengen tayung Sikandang lalu nyahu ramin nŭh. Tayung Sikandang dengen bala sungkuh nŭh pun kabŭs kokot. Kiau dengen Piamang pun bira-i nitih bala asau nŭh dŭ mbŭh nyumak ndŭg rangit. Bala duwŭh ti bira-i sampe kulus lalu bitukar jaji tigareg. Ngin asŭng Kiau dengen Piamang ti bira-i campur beji bidendam dengen misiya, wang rangit pŭtŭ, mesti tigareg nyanda ngaba ujan mŭhŭn ujan ngancur tarun. Lagipun inya dŭ duwŭh si-en mikir rangit pŭtŭ ngin dog sinayung nyipŭh dŭ ngaban bala asau nŭh nyumak ndŭg rangit lalu inya duwŭh ti pun ngaba asau bala nŭh balik. Si-en beda tigareg selalu nyanda ngaba ujan wang rangit pŭtŭ beda remang.






 

 



 


 

Tanŭn Babeh Alakku Aji Ndŭg Tahang

Ronica (1A)







 
Adŭh indi andu, turang babeh alakku biganan Kijeng dengen dingan nŭh Kaleng, aji ndŭg tahang. Tahang si-en biganan Tahang Milodom, tempet inya sani nŭh magau bumbun manuk tipilis, pak iti nŭh mbŭh anyap bumbun manuk tipilis a-in. Kijeng dengen Kaleng ti ndŭg tahang si-en ngin bala nŭh ira ngumbit bumbun manuk tipilis.



Wang bala nŭh sampe dŭ tahang si-en, Kaleng ngaban Kijeng nyumak nyambu ndŭg bubung darŭd si-en ngin nŭh adŭh kaping inya nyanda menang dŭ sambu si-en ahi bumbun manuk tipilis. Bala duweh si-en pun panu sampe tok bubung darŭd sien. Bala duwŭh si-en tubŭk ahi rayŭ bumbun manuk tipilis dŭ a-in. Inya duwŭh si-en pun birangŭn asŭng lalu ngumo bumbun manuk si-en.



Mbŭh ahi bumbun manuk nche-en inya duwŭh si-en, Kaleng pun ngaban Kijeng meri pak Kijeng aga kŭnŭh meri. Nŭh ira ngaban Kaleng ndŭg sesah dindi tarun si-en ngin nŭh adŭh kidingah yu omon maman a-in. Nŭh ira ngaban Kaleng krimuhas jawi ngin nŭh kinyem andu paras rayŭ. Lagipun paras nyam nŭh mbŭh ngumo bumbun manuk dŭ ahi rayŭ.



Kaleng pun situju dengen sanda Kijeng. Lalu bala duwŭh si-en pun panu ndŭg tempat dŭ kuan Kijeng. Sampe tok tempet si-en, inya duwŭh si-en tubŭk adŭh kulam mung tempet inya mamuh. Dŭ tempet si-en adŭh batuh dŭ jalŭh mung ka odog tundah inya. Rap nyam tibu Kaleng. Kaleng tirawŭ bin adŭh mindu a-in. Kaleng ngaban Kijeng meri pak Kijeng manag ngandai sikejep ngin adŭp nŭh ira krimuhas jawi nŭh.



Kai tuhai dŭ duwŭh si-en ngulu, puli andu ujan jala. Ujan jala si-en pun ngundah bukang (pelangi). Wang masa si-en, Kaleng dengen Kijeng kaping adŭh yu angun bala dayung bilagu. Kaleng dengen Kijeng tirawŭ lalu cepet-cepet nyukŭ dŭ anchah batuh.



Kai tuhai mbŭh si-en, inya duwŭh si-en ntubŭk adŭh iju urang dayung timŭngŭn rayŭ mung dayung kumang muhun mesu rangit minan bukang si-en. Bala nŭh papu dŭ kulam si-en lalu terus mamuh a-in. Mbŭh bala dayung si-en ku-on mamuh, andu pun ku-on ujan jala. Sibayuh bukang si-en biragan, bala dayung si-en cepet-cepet nyumak balik ndŭg bukang si-en. Wang bukang si-en mbŭh anyap tanggah, bala dayung si-en pun anyap tanggah.



Wang bala dayung si-en mbŭh anyap tanggah, Kaleng dengen Kijeng cepet-cepet meri ndŭg ramin. Sampe tok ramin, kai bala dŭ duwŭh urang si-en nyanda pasal pinapud bala nŭh ndeg inya bŭkŭn. Ngarŭ si-en, Kijeng piamŭh amang bala dayung kumang si-en napud adŭp nŭh. Amang bala dayung kumang si-en manang adŭp nŭh puan Kaleng dengen Kijeng adŭh tubŭk bala anak nŭh mamuh.



Amang bala dayung kumang si-en kai baji dengen dŭ duwŭh urang si-en ngin bala nŭh kai singaja ira ngintip bala anak nŭh mamuh. Mina nŭh kijaman dŭ duwŭh urang si-en pida-an ndŭg inya dŭ bŭkŭn. Kan dŭ duwŭh urang si-en pida-an ndŭg inya, bala nŭh ira mendem. Mina babeh alakku nanŭn ndŭg tayung alakku pasal tanŭn ti. Tayung alakku dŭ nanŭn tanŭn ti ndŭg ami.






 

 



 


 

Kenangan Simpog Dŭ Pa-It Dengan Dŭ Sidi

Eva ak Endrew (1A)







 

Adŭh indi andu, Simpog dengan umbu nŭh ngajah amang nŭh motong petek. Simpog rasa malas rayŭ ira mekat jagŭ bina brupagi. Lagipun, masa si-en anak sikulah cuti. Walaupun mung si-en, Simpog terpaksa legi meket jagŭ. Walaupun kai biasa ma-an sungkoi wang brupagi, Simpog terpaksa legi ma-an ngin nŭh perlu tenaga tinan nyumak tringkang dŭ kebun petek amang nŭh. Mbeh ma-an, bala nŭh pun panu ndŭg kebun petek. Simpog panu dengan lambat rayŭ. Bala nŭh panu kaja ndŭg kebun ngin kebun petek si-en kai nŭh juho mesu ramin bala nŭh.



Wang bala nŭh sampe ain, amang nŭh terus motong petek. Simpog dengan umbu nŭh mina jaji ungkui dŭ kanang ngin bala nŭh kai pandai suwŭ motong petek. Ti mah mŭlŭ dŭ duweh si-en ngajah amang nŭh motong petek.



Indi jam setengah mbŭh si-en, batang petek pun abo odog potong. Bala nŭh ngandai sekejap. Pak Simpog dengan umbu nŭh ngeden ira meri. Lalu bala neh pun meri. Simpog meri lalu mamuh. Mbuh si-en, nŭh ngandai rileks.



Kira-kira pukul 10.00 brupagi, bala nŭh muhun ngarang petek. Iti neh, baru Simpog adŭh semangat. Simpog pun dapat ngarang mehi tengŭn petek. Masa nŭh ngarang tengŭn petek dŭ ke mehi, nŭh tilasur. Omon petek nŭh pun saye. Siluar nŭh bisa odog omon petek. “ Ahh… kai jaji anih! Ti kali pertama bah. ”kuan nŭh. Umbu nŭh ngenyem lalu nyanda “Napŭh aba kŭnŭh-kŭnŭh. Kiyŭ mah ngundah kireja. Mati obo omon petek sayŭ, monganih boh. ”



Mbŭh obo petek odog narang, bala nŭh pun meri. Simpog meri ngaban siluar nŭh bisa odog omon petek da sayŭ si-en. Kai selesa inyem nŭh. Duwah pimanu bala nŭh meri, Simpog rumpos dŭ rubang lagi. Dakŭs lagi siluar nŭh odog tana. Bi-ek rayŭ nasib Simpog andu si-en. Mbŭh duweh kali nŭh odog pinyusah andu si-en.



Obo buran si-en, amang nŭh nyua petek dŭ ce-en bala nŭh buran si-en. “Yahoo…dapat duit., dapat duit!” kuan Simpog. Neh dapat RM50. Umbu nŭh pun dapat samah. Tapi, amang nŭ dapat labih. “ Walaupun aku duweh kali odog susah tayŭ nŭh, pak nasib bi-ek aku si-en ngaban duit. ” kuan Simpog. Pingajar mesu tanŭn iti si-en mah kita perlu bisusah tayŭ, mbŭh si-en pajin adŭp dapat pinyenang.

 





 

 



 


 

Kenangan Masa Aku Melawat Wang Lagi Dŭ Sikulah Rendah

Lesciana (1A)





 

Wang rimŭh andu buran simŭhŭng sewa duwŭh ribu enem, ami adŭh ngundah lawatan. Sibayuh ami melawat, amang andŭ ami ngisi borang. Mbŭh si-en baru ami melawat. Ahi tempat dŭ ira tuju ami. Tempet si-en Sematan Resort, Darŭd Singai dengen Gua Angin.



Pukul enem brupagi, ami ngampan de stesen bas sikulah ngin ira ngampan bas. Ami jalan mesu sikulah wang pukul 7.00 brupagi. Ami ndŭg Darŭd Sangai tayŭ ngin tempet lawatan si-en dŭ paling juho. Sampe tok segan Darŭd Singai, ami pun muhun masu bas. Ami penu keja gatuh darŭd si-en tingin ami simayang Jeran Salib. Mbŭh obo simayang jeran salib, ami pun bigambar dŭ bubung darŭd si-en. Mbŭh si-en ami pun muhun masu darŭd si-en.



Tempat dŭ kiduweh de najung ami si-en mah Gua Angin dŭ Bau. Wang ami sampe tok gua si-en, ami pun mŭrŭt ndŭg gua si-en. Wang ami jalan da gua si-en, ami adŭh tubŭk bala jingawet bikateng dŭ abih gua si-en. Ami jalan de gua si-en minan jamatan dŭ adŭh sidiya tundah inya tinan panu de gua si-en. Abih gua si-en bebi rayŭ. Dŭ abih gua si-en, ami adŭh ngumbit gambar. Mbŭh puas ami milawat dŭ Gua Angin, ami pun ndŭg Sematan Resort.



Wang ami tok Sematan, ami muhun dengan ngaban beg ndŭg chalet. Tok chalet, ami muka aircond. Mbŭh si-en ami pun gumon dŭ pantai. Ahi pimain tundah ami. Pimain si-en mah ngisi umon de abih botol, main bol dengan ahi lagi pimain de beken. Aku mŭnŭ-mŭnŭ senang asŭng. Mbŭh ami gumon, ami pun gumon sikali lagi de chalet tinan ngirasi tibu ami mesu omon laut de pide. Mbŭh ami gumon, ami pun ma-an de chalet. Bingarŭ si-en, ami simayang Rosari. Wang ami simayang Rosari, ami kaping buntan rabu dŭ tana dengan indi dingan ami nguntut wang simayang si-en.



Ami simua nginyŭm tŭbŭk nu. Mbŭh ami simayang, ami nataw ngingat nŭh. Mbŭh si-en, ami pun jalan dŭ pantai. Ami tŭbŭk ki-uh dŭ pantai. Mbŭh jalan dŭ pantai ami pun balik lalu bŭ-ŭs. Wang andu dŭ dindi, ami makat lalu gumon dŭ laut si-en lagi. Mbŭh ami gumon, ami ma-an. Kira pukul 9.00 brupagi ami penu meri.



Pak sibayuh ami meri ndŭg binua, ami ngajung tempet melawat ami dŭ pangan nŭh si-en mah Airport Kuching. Wang ami sampe Airport Kuching, ami pun merŭt ndŭg airport. Ami bigambar dŭ airport si-en. Ami dapat ahi pengalaman masa lawatan siti. Ami balik ngaban siribu kenangan.







 

 



 


 

Tanŭn Amang Alui

Jenny anak Dadi





 

Sani ngami nŭh, adŭh namba tu-uh dŭ biganan Amang Alui. Amang Alui ti mudip dengen asau nŭh, Ande Alui. Indi andu, Andŭ Alui nganchak Amang Alui mirih pekuh dengen tapeh. Andŭ Alui nyanda dengen Amang Alui, “Oh, Amang Alui! Ga-ih amu ndŭg kade lalu tulung birih pakuh dengen tapeh nyugon aku. Tapeh sien ira tinan aku nutu tana aku ti.”



Amang alui pun panu ndŭg kade. Lema nŭh sampe dŭ kade, nŭh tubek kambut paku. Neh mikir kayuh si-en dŭ beda Andŭ Alui nŭh mirih lalu birih nŭh indi kilo. Kai nŭh puan Ande alui nganchak nŭh mirih panŭ pakuh. Mbŭh sien nŭh mirih tapeh dŭ mahar lalu panu meri.

Dŭ jaran, nŭh ntubŭk ahi itah tana lalu nŭh nyanda dŭ asŭng, “Andŭ Alui nganchak aku mirih tapeh tinan nutu tana. Ti itah tana dŭ kuan nŭh si-en jangka nŭh.” Lalu Amang Alui pun nyatak tapeh dŭ birih nŭh lalu nutu itah tana dŭ tubŭk nŭh si-en.



Sampe tok ramin, Andŭ Alui pun nyiken Amang Alui, “Dapih boh tapeh dŭ beda aku amu mirih nŭh ijen?” Saut Amang Alui, “Kan amu nganchak aku nutu itah tana minan tapeh si-en. Aku ngundah yu dŭ kuan amulah. Nah, ti paku dŭ beda amu aku mirih nŭh.”

Andŭ Alui pun baji lalu nyanda, “Anyap aku nganchak amu mirih paku. Aku nganchak amu mirih panŭ pakuh tinan panŭ dengen mirih tapeh tinan nutu tibu aku ti ngin aku mbŭh anyap tapeh lagi.” Andŭ Alui mŭne-mŭnŭ beji lalu nŭh aga nganchak Amang alui ma-an dŭ andu si-en masu brupagi sampe tok lambat andu.



Si-en mah cirita Amang Alui salah mirih barang. Pingajar mesu cirita iti si-en mah kaping mŭnŭ-mŭnŭ sanda pitayŭn inya supaya adŭp ka-i salah kaping. Wang adŭp salah kaping sanda inya, semua kireja adŭp ka-i nŭh marui dengen adŭp pun ka-i pandai maju



 

Home